\
/
\
/
● ●
ودِّي أموت .. اليوم ... وأعيش باكر
وأشوف مِنهو .. بعد موتي فقدني ..!
● ●
ومِنهو حَمَلني لِين .. ذِيك .. " المقابر "
وأشكر أنا .. كِل من كَرَمني ودِفنِّي
● ●
وبَشوف .. يرثيني أنا كَم [ شاعر ] ..؟
ومِنهو تركني .. وما كِتَب شَي عنِّي
● ●
شِخصٍ تعنَّى لي .. مع إنَّه .. مسافر
وشخصٍ قِريبٍ .. وآنا مَيِّت / طعنِّي
● ●
وشخصٍ يمثِّل دمعِتَه .. ما هو قادر !
وشخصٍ تِطيح دموعه كِل ما ذكرني
● ●
ومِنهو مِن أهلي فـ العَزا كان حاضر ؟
ومِنهو دعى لي في " صلاته " ورحمني
● ●
ومِنهو بنى [ بإسمي ] سبيل ومنابر
ومِنهو يفز قلبـه .. إلا مِن لمحني
● ●
ومِنهو عشاني : طول الأيام ساهر ..!
ومِنهو ثلاث أيام .. راح وتركني ..؟
● ●
ومِنهو يرتِّب .. غرفتي .. / والدفاتر
وإن شاف ( صوره ) لي مات وحضنِّي
● ●
يالله عسى .. ما تغفى كل المشاعر
ويالله عسى .. ما ينصِدِم يوم ظنِّي
● ●
خايف يروح العُمر .. وأكون خاسر
وإن طار طيري .. ما يفيد / التمنِّي
● ●
وخايف يجيني وقت : أكسِر خواطر
إن دارت الدنيا .. وزماني كسرني
● ●
ومدام هذي الدنيا .. صارت مظاهر
وكِل مَن على كيفه .. وجَوَّه يغني
● ●
[ صحيح مُسلم .. لكن : الهَم كافر
كل ما بغيت أضحك يهددني حزني ]
● ●
الضيق وافـي .. والحزن حيل وافر
والجرح أكثر شي .. شفتـه يحبني
● ●
عايش وميِّت بين .. ماضي وحاضر
والصبر [ مفتاح الفرج ] ضاع منِّي
● ●
قل وش تبي وتتركني يا حزني آمر
مسكين فرحي / تصدِّق إنَّ وحشني !!
● ●
( شاعر ) ولكنِّي .. ماني بـ شاعر
ودِّي أموت اليوم .... وأرتاح منِّي !!
● ●
أحمد الصانع
20-Aug-2008, 04:25 AM
مواضيع جديدة في قسم الشعر وأبيات القصيد 
العرض العادي
